Ephesians 4

1Mi gyi fye wye, emi nmi dna n kurkuku ntu Dagayi bauta ɓo nyi, fye zan-zan fya zhin aɓo n kunce n na zayi n na la ɓa kni, ntu n anabarka wo-wo yi ye pya ɓo. 2Fye gba fyehin tukwo fya zhin peceiye, fye zhin hakuri n na ajeyi, ntu ye-ye ɓo to fya gye aje laifin ngye nya ho nun. 3Fye zhin atna fya fa Zafun Gyi-gyi-yi wa dna fye n zokwo nlonu fya sa-se n najei n bugbafu yi.

Aɓo Zaho-zahoi Ɓa Mi Wa Zhin

4Yi zhin aga nanyi gmanyi nyanu, yi n Zafun gmanyi nu, ai la yi yi ntu n na aɓo a manayi ɓo. 5N yi aba, yi n Dagayi gmanyi nu, gaiciya ga gmanyi, baptisma gmanyi. 6Yi n Shekwoyi gmanyi nu, Oda nwo tu n na aza sin vinya, woi sase dna n yi vinya woi lo tnu-tnu n yi. 7Kristi n la ɓe-kpezhin ga zaho-zahoi enya nwo n cei pma ya bwa dna n wo nyabwa gna.

8Zabura kayi ɓei kuci ge sanu n Kristi ɓei jeze lo eshe dna n nasara n wo kalala avun n vingwo, n nasarayi n shetan tukwo, wa ga aza acauta n mwa begye. 9Woi cige wo ɓei jeze lo eshe mi, kwa wu nuge wo ɓei gmi n eshe mi wa kashi ɓe anyi har anyi sinta. 10Oza n wa kashi ɓenyi, owo nu na jeze lo, n na bai n wo ɓa nu anya vinya n wohin, n anyimi har n she yi ɓe. 11Azaho n yimi a ku ɓe-kpezhin gaɓa, ngye atnu-tnuyi, aza ho wa gaba waʼazi kpe-zhin, azaho ɓami ɓa gni aza ɓe cei n Kristi aba, ɓai bma ɓa zhin ɓa kpema wo ngye oɓa Gniyi. Azaho ɓa shi Shekwoyi aza bwa, ngye a knikna yi ɓai wuɓa, ɓai dnaɓa n Shekwoyi zokwo. 12Kni nu zhin woi gayi ɓe-kpezhin n nabai ya kpe aɓo zhin n bmiya? N na abai Shekwoyi aza ɓami ɓa zhin tnu-tnu manayi gawo, ɓa mi ikklisiya, Kristi nayi kwa mwa kwa bwa kala. 13Har ya ga gaiciya gmanyi ntu n yi gni-gni ɓo, n yi Gniyi, Shekwoyi Nugun, ya mwa fi n Dagayi, E, har ya si aba n Kristi ɓa dna n yi mi dei-dei.

14Nnavun yita shan ze ngye aɓin, yi shan abugba do na anya ɓo n yi ga gaiciya n, ntuge aza ɓe yi n wuwu akata nya yi, yi gye ngye gaiciya nu. 15– 16Nkwo apita yivi gaiciya dna n ye-ye nsai vinya, yida gaiciya, yi zhin aɓo dna n gaiciya, yi sase dna n gaiciya, n na bai ya ze ngye Kristi n wo zhin owo nayi tukwo danyi, wato Ikklisiya, Dna n wo ɓewu nayi vinya nku aje dei-dei, oga dohodohoi n kwo zokwoyi, kwoi bma do zhin, n na bai n nayi vinya ɓa bwa lafiya, kwa mwa n nu-nuyi n yeyi.

Zan-zan Dna Wye- Wyeyi Woiwoyi

17– 18Mi daɓo n fyei dna n Dagayi, fyeto shan ase-se ngye a tna viyin, ntuge awye nku ɓa bua, aɓo ku ɓa gmi aje. Oɓa bugba gu-guyi lo n nunuyi n wyegmayi, ɓa mwa kpalo n wye-wyeyi Shekwoyi nya yi, ntuge ɓaku ɓa bugba gu, to ɓa wowon, ɓa ta kpewo a zokwo ye lon. 19Ɓata damu lo n ɓe nukoyi kwo ɓemanayin, ɓa ku ɓahin ga a ɓenukwoyi zhin. Ɓata fa ɓeho zhin ɓo, nɓa bugba nukwoyi, nɓa shakpe yi gna ɓa ge ɓa zhin m.

20Ama Kristi to ɓei wufye n lo nun. 21Ngye fye ku owo begye wo, fyei ku owo fyei ku owo gaiciya tumwi, 22To, fyeku a nayi kwo-kwoi ya, n kwo ɓei zhin aɓe a nukwoyi nyi, n kwo la bo vinya n nu-nuyi n shakpei.

23Nsaiye efye hali n fye a nubo zhin yi, tilas ɓa shando cici ɓa ze amanayi. 24E, tilas fya ze aza woi-woi, n gyi-gyi-yi n bmiya. Fye ku nayi woi-woi ye kpe.

25Fye to zhin akata cefi ajen, fye da gaiciya, ntuge yi zhin aje aga nu, idan ya ce a kata fi aje yi kni aje bugba nu. 26N ha gyi minagyi to zhin laifi ha fa minagyi yi fi n ho min, to fa nyipyeyi kwa shin hoi gyi minagyin, ku kwo ze amwi npye.

27Gama n ha gyi minagyi, ho ga shetan apita tu ba nu. 28Ndei oza wyivi lo, tilas wa fa evi wyiɓo, wa ya tnu-tnu zhin n wo abwayi, n nabai wa bma azaje zhin n ɓa gyi san lo. 29To da ɓeda nukwoyin, bwa ɓedanu da n kwo ɓa bma aza zhin n ho daɓo n ɓai, enya n kwo ɓa gaba anabarka. 30Fye to wun Zafun Gyi-gyi-yi bugba yan, ntu n fye zan-zan ɓon, Fye pa ge owonu na tufye ze har nyipyeyi n gni-gni n laifi ɓei nu ncei. 31Fye kufa napye ɓo n minagyi yi, anyawu, ɓeda nukwoyi, fye to fa a tna ajeye kwa lo dna n fya tasin m. 32Fye bwa bugba manayi n na jeyi, fyei ye n na jeyi, fyei zhin aje gafara shi Shekwoyi wa zhin fye gafara ntuge fye zhin Kristi nya nu nyi.